Enskir yfirburðir í Róm

England vann öruggan 4-0 sigur á Úkraínu í 8-liða úrslitum Evrópumóts karla í fótbolta í kvöld. Þeir ensku mæta Dönum í undanúrslitum á miðvikudagskvöld.

England var að spila sinn fyrsta leik utan heimalandsins, eftir fjóra leiki á Wembley, og voru þeir mættir til Rómarborgar í kvöld. Þeir kunnu litlu verr við sig þar en heima við þar sem þeir voru með tögl og hagldir allt frá upphafi.

Englendingar byrjuðu af krafti. Harry Kane kom liðinu í forystu eftir aðeins fjögurra mínútna leik þegar hann afgreiddi boltann vel af stuttu færi eftir frábæra stoðsendingu Raheem Sterling sem hafði sótt inn á völlinn frá vinstri áður en hann sendi Kane í gegn.

Frá fáu öðru er að segja í fyrri hálfleiknum. Úkraínumönnum gekk bölvanlega að finna leiðir fram hjá enska liðinu sem stýrði ferðinni, hélt í boltann, og virtist sátt við stöðuna. 1-0 stóð í hléi.

Síðari hálfleikurinn fór hins vegar álíka fjörlega af stað og sá fyrri. England fékk aukaspyrnu á fyrstu mínútu sem Luke Shaw gaf fyrir markið. Hann fann höfuðið á Harry Maguire sem skallaði boltann í netið á fyrstu mínútu síðari hálfleiks.

Aðeins fjórum mínútum síðar átti Luke Shaw aðra fyrirgjöf eftir að Sterling gaf hælsendingu á hann í utanáhlaup. Shaw fann þar aftur höfuðið á Harry, en í þetta sinn Kane, sem skallaði boltann á milli fóta Heorhiy Buschan, markvarðar Úkraínu. Staðan var því orðin 3-0 eftir aðeins fimm mínútna leik í síðari hálfleik.

Jordan Henderson, fyrirliði Liverpool, kom inn á sem varamaður fyrir Declan Rice skömmu síðar og hann skoraði fjórða mark Englands á 63. mínútu þegar hann skallaði inn hornspyrnu Masons Mount. Markið var það fyrsta hjá Henderson fyrir enska landsliðið, í hans 62. landsleik.

Yfirburður Englendinga í leiknum voru í raun algjörir. Úkraínumenn sáu aldrei til sólar og þeir ensku áttu auðvelt með framhaldið sem var tíðindalítið. 4-0 urðu úrslit leiksins, Englandi í vil, og munu þeir því snúa heim á Wembley og mæta þar Dönum í undanúrslitum.

Leikur Englands og Danmerkur fer fram á miðvikudagskvöld klukkan 19:00 og verður sýndur beint á Stöð 2 EM. Degi áður er leikur Spánar og Ítalíu í undanúrslitum, klukkan 19:00 á þriðjudag.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.