Spurning vikunnar: Hversu oft ferðu í sleik við makann þinn?

Þessi ástríða sem einkennir oft á tíðum tímabilið þegar fólk er að byrja saman breytist yfirleitt með tímanum, eðlilega. Lífið og hversdagurinn tekur við eftir ferðalagið saman á bleika skýinu.

Það er ekki þar með sagt að ástríðan og fiðringurinn þurfi að minnka eða fjara alveg út, heldur þurfum við kannski að hafa aðeins meira fyrir því að kalla þessar tilfinningar fram. Halda þeim við. 

Er mögulegt að vekja aftur upp kossatímabilið?

Spurningunni hversu oft pör stunda kynlíf er oft velt upp í umræðum um sambönd og ástríðu eða ástríðuleysi í samböndum. En hvað með kossana?

Þessa innilegu djúpu kossa sem ekkert endilega þurfa að leiða til kynlífs? Þessar kossastundir sem margir upplifa sem einhvers konar alsælu í byrjun sambands. 

Er óraunhæft að halda því við eða jafnvel kveikja á því aftur? Gleymum við því jafnvel að eyða tíma í að kyssast innilega og leggjum aðal áhersluna að halda kynlífinu við? 

Eðlilega er það misjafnt á milli fólks og para hversu mikið snerting, ástríða og kynlíf vegur í sambandinu en er ekki áhugavert að hugsa til þessara djúpu kossa sem kveiktu allar tilfinningarnar í byrjun?

 Hversu langt er síðan þú fórst í sleik við makann þinn? 

Spurning vikunnar er að þessu sinni beint til allra þeirra sem eru í langtíma ástarsambandi. (Sambönd sem hafa verið til í allavega ár eða meira.)

Hversu oft ferðu í sleik við makann þinn? 

Makamál hafa síðustu tvö ár spurt lesendur Vísis nær vikulega um þeirra skoðanir og viðhorf varðandi málefni tengd ástinni, samböndum, tilfinningum og kynlífi.

Fyrir áhugasama er hægt að nálgast allar fyrri Spurningar vikunnar og niðurstöður hér.