Er rauða flóðbylgjan að verða að smá skvettu?

Forvöl sem haldin voru í New York-ríki og Flórída í gær, auk sérstakra kosninga í New York, eru talin sýna að staða Repúblikana sé mögulega ekki eins og góð og þeir vona og Demókratar óttast.

Þingkosningar á miðju kjörtímabili forseta reynast oftar en ekki erfiðar fyrir þann flokk sem er við völd í Bandaríkjunum. Undanfarna mánuði hefur útlitið verið á þann veg að Demókratar eigi undir högg að sækja og eru þeir líklegir til að tapa meirihluta sínum í báðum deildum þingsins.

Frá því Hæstiréttur Bandaríkjanna felldi úr gildi stjórnarskrárbundinn rétt bandarískra kvenna til þungunarrofs hefur Demókrötum þó vaxið ásmegin. Peningar hafa streymt í kosningasjóði þeirra og fylgi þeirra hefur aukist í könnunum. Þátttaka í forvölum Demókrataflokksins hefur þar að auki verið mikil.

Demókratar hafa heilt yfir staðið sig mun betur en kannanir höfðu gefið til kynna í öðrum sambærilegum kosningum í Bandaríkjunum, eins og í Nebraska og Minnesota.

Kanarífugl í kolanámu

Í frétt Politico segir að sérstakar kosningar og forvölin í gær gefi ekki endilega raunsæja mynd af mögulegum vendingum fyrir kosningarnar í nóvember. Kosningarnar í New York, og þá sérstaklega í nítjánda kjördæmi ríkisins, þar sem tveir frambjóðendur kepptu um þingsæti Antonio Delgado, sem var að hætta, gefi þó þá skýrustu mynd sem sé í boði.

Kjördæmið er svokallað baráttukjördæmi en Trump vann þar í forsetakosningunum 2016 og Joe Biden árið 2020. Hart var barist um þingsætið og vörðu báðir flokkar miklum peningum í baráttuna. Þá gerðu flokkarnir einnig tilraunir með boðskap sinn fyrir kosningarnar í nóvember.

Rebúblikanar keyrðu á efnahagsmálum og hárri verðbólgu en Demókratar lögðu áherslu á rétt kvenna til þungunarrofs. Pat Ryan frá Demókrataflokknum vann Marcus Molinaro í kosningunum með 51,1 prósent atkvæða gegn 48,9 prósentum.

Einn viðmælandi Politico segir að kosningin í nítjánda kjördæmi New York sé eins konar kanarífugl í kolanámu. Hún sýni að staða Demókrata sé ekki eins slæm og talið sé.

Það hvernig kosningin fór mun þó hafa lítil áhrif til lengri tíma, þar sem þingsætið mun hverfa í nóvember vegna breytinga á kjördæmum.

Hagnast á breyttum kjördæmum

Repúblikanar í ríkisþingum Bandaríkjanna, hafa gert umfangsmiklar breytingar á kjördæmum ríkja sem munu reynast þeim vel í baráttunni um meirihluta í fulltrúadeildinni. Á ensku kallast þetta Gerrymandering. Það gengur í stuttu máli út á það að breyta kjördæmum og draga þannig úr vægi atkvæða kjósenda hins flokksins.

Hér má sjá útskýringarmyndband USA Today frá því í sumar þar sem Gerrymandering er útskýrt.

Demókratar reyndu að gera Repúblikönum óleik með því að gera breytingar á kjördæmum New York en hæstiréttur ríkisins steig þar inn í. Rétturinn sagði breytingarnar ósanngjarnar og lét tekna upp ný og sanngjarnari kjördæmi og fresta kosningum á meðan sú vinna stóð yfir. Það hefur þegar kostað Demókrata eitt þingsæti í fulltrúadeildinni.

Í Manhattan þurftu tveir þingmenn Demókrataflokksins til að mynda að keppast um sama þingsætið í breyttu kjördæmi. Það voru þau Jerrold Nadler og Carolyn B. Maloney en bæði eru þau áhrifamikil innan Demókrataflokksins. Nadler vann fovalið.

Aðra sögu er að segja frá Flórída þar sem Ron DeSantis, ríkisstjóri, og ríkisþingmenn Repúblikanaflokksins, gerðu breytingar á kjördæmum ríkisins. Hæstiréttur Flórída, þar sem allir dómararnir hafa verið skipaðir af Repúblikönum, sögðu ekkert að því að breyta kjördæmunum.

AP fréttaveitan segir þessar breytingar hafa haft mikil áhrif á Demókrataflokkinn og þar á meðal leitt til þess að tveir þeldökkir þingmenn Demókrataflokksins missa sæti sín. Kjördæmi þeirra, þar sem kjósendur eru flestir þeldökkir, var breytt gífurlega.

Trump ræður

Forvölin í New York og Flórída, og í öðrum ríkjum í sumar, hafa sýnt að Donald Trump, fyrrverandi forseti, er enn gífurlega áhrifamikill innan flokksins. Í Flórída sigruðu margir af frambjóðendum sem hann styður í forvölum Repúblikanaflokksins.

Þar á meðal eru mjög umdeildir frambjóðendur sem hafa meðal annars tekið undir lygar Trumps um að svindlað hafi verið á honum í forsetakosningunum 2020, sem hann tapaði.

Washington Post segir frá því að Laurel Lee, fyrrverandi innanríkisráðherra DeSantis, hafi sigrað forvalið í einu af fjölmörgum nýjum kjördæmum Flórída. Hún hefur verið í forsvari viðleitni Repúblikana til að gera fólki erfiðara að kjósa í Flórída. Dómari felldi niður hluta þeirra reglna sem Lee og aðrir Repúblikanar komu í gegn og sakaði þau um að beina sjónum sínum sérstaklega að þeldökkum kjósendum og reyna að grafa undan kosningarétti þeirra.

Fulltrúadeildarþingmaðurinn Matt Gaetz vann einnig í sínu forvali. Hann er ötull stuðningsmaður Trumps og er til rannsóknar vegna gruns um að hafa brotið mannsalslög.

Sjá einnig: Vinur Gaetz ætlar að játa og starfa með saksóknurum

Forvöl gærdagsins og síðustu vikna sína glögglega hve sterkt tak Trump hefur á Repúblikanaflokknum.

Áhrifamenn innan flokksins eru þó sagðir hafa áhyggjur af því að fjöldi umdeildra og óreyndra frambjóðenda Repúblikanaflokksins muni koma niður á flokknum í kjörklefum Bandaríkjanna. Aðrir kjósendur en stuðningsmenn Trumps muni hika við að kjósa þetta fólk.

Sjá einnig: Fleiri Repúblikanar ósáttir við Trump

Kannanir hafa sýnt að vinsældir Trumps meðal almennra kjósenda og kjósenda Repúblikanaflokksins hafa farið dvínandi. Stuðningsmenn Trumps eru þó manna duglegastir við að taka þátt í forvölum flokksins.

Hafa staðið sig betur en Biden

Frá því Hæstiréttur Bandaríkjanna felldi rétt kvenna til þungunarrofs úr gildi hafa verið haldnar fimm kosningar um þingsæi fráfarandi þingmanna í Bandaríkjunum. Demókratar hafa staðið sig betur en búist var við í öllum þeirra, að virðist.

Samkvæmt New York Times hafa Demókratar fengið stærri hlut atkvæða en Biden fékk árið 2020 í fjórum af þessum kjördæmum. Í því fimmta, í Alaska, liggja lokaniðurstöður ekki fyrir en útlit er fyrir að þar sé það sama upp á teningnum.

Að meðaltali unnu Repúblikanar kjördæmin fjögur með 3,7 prósentustigum. Trump vann þessi sömu kjördæmi með 7,7 prósentustiga forskoti, að meðaltali, árið 2020. Þetta er þó nokkur munur og lítur ekki vel út fyrir Repúblikanaflokkinn þegar tekið er til skoðunar að Trump fékk 4,5 prósentustigum færri atkvæði en Biden á landsvísu.

Þetta gefur sérstaklega til kynna að líkur Repúblikana á því að fjölga sætum sínum í öldungadeildinni séu ekki góðar en þar eru engin kjördæmi heldur kjósa allir íbúar ríkja Bandaríkjanna um sömu frambjóðendurna.

Eins og farið er yfir hér að ofan, er það mjög sjaldgæft í kosningum sem þessum. Sá flokkur sem er við völd fær iðulega að kenna á því og þannig var útlitið fyrir tiltölulega stuttu síðan. Þannig er útlitið ekki lengur og bæði Demókratar og Repúblikanar virðast átta sig á því.

Blaðamaðurinn Jake Sherman birti í kvöld mynd af fjáröflunartölvupósti sem Repúblikanar eru byrjaðir að senda út til stuðningsmanna sinna. Þar segir að staða Repúblikana sé vægast sagt ekki góð.