Nokkur hundruð nemenda mótmæla við MH

Þetta er meðal þess sem kemur fram í kröfugerð sem hópur nemenda samdi á opnum fundi í Andrými á Bergþórugötu í gær. Hópurinn safnar undirskriftum við kröfugerð sína fyrir utan MH í dag. Boðað hafði verið að nemendur myndu ganga út úr skólanum klukkan ellefu sem mikill fjöldi.

Að neðan má sjá upptöku frá samstöðufundinum.

Fréttamaður Vísis á staðnum áætlar að um þrjú hundruð nemendur séu við skólann nú um ellefu leytið og fer fjölgandi. Ásmundur Einar Daðason mennta- og barnamálaráðherra er á svæðinu. Sömuleiðis Steinn Jóhannsson rektor MH.

Nemendur halda á skiltum og nemendur lýsa kröfum sínum í ræðum. Mikil samstaða er á fundinum og mikið fagnað við flutning kröfugerðar nemenda. „Skilum skömminni“, „Elskum án ofbeldis“ og „Stöndum með þolendum“ er á meðal áletrana sem rituð eru á skilti.

Eftir því sem leið á samkomuna fjölgaði mjög. Má telja líklegt að fjöldinn hafi skipt fleiri hundruð ef ekki þúsundum ungmenna.

Samkvæmt upplýsingum fréttastofu eru samstöðumótmæli með MH-ingum í Lystigarðinum á Akureyri. Nemendur við VMA og MA gengur út úr skólanum klukkan ellefu.

Að neðan má sjá ræðu Urðar Bartels, nemanda á öðru ári við MH, á samstöðufundinum í dag.

Hér að neðan má svo lesa kröfugerð nemenda.

Mótmæltu á mánudag

Nemendur í Menntaskólanum í Hamrahlíð mótmæltu því í á mánudag að nemendur skólans sem væru þolendur kynferðisofbeldis þyrftu að mæta gerendum sínum á göngum skólans. Una Ragnarsdóttir, varaforseti nemendafélags menntaskólans, sagði að viðbrögð skólastjórnenda hefðu verið góð en málið varpaði ljósi á stærri spurningar.

„Eins og hvar er miðlæg viðbragðsáætlun Menntamálaráðuneytisins í kynferðisbrotamálum sem hefur verið kallað eftir lengi og enn virðist ekkert vera að breytast. Hvaða ítök hefur skólastjórn raunverulega til að gera eitthvað? Hverju þarf að breyta innan kerfisins til að þolendur fái þann stuðning sem þeir þurfa og geti stundað nám án raskana?“ spurði Una.

Brynhildur Karlsdóttir, söngkona og fyrrverandi nemandi við MH, skrifaði á þriðjudag grein sem birtist á Vísi um svipaða upplifun hennar innan veggja skólans árið 2013. Hún var þá sautján ára og hafði verið nauðgað af vini sínum og samnemanda. Hún sagði lítið hafa breyst hjá skólanum síðan þá. Matthías Tryggvi Haraldsson, unnusti hennar, skrifaði harðorða skoðunargrein í framhaldinu og fordæmdi viðbragðsleysi stjórnenda MH.

SÍF vinnur með stjórnendum MH

Stjórn Menntaskólans við Hamrahlíð harmaði í framhaldinu að núverandi og fyrrverandi nemendur hafi upplifað vanlíðan vegna kynferðislegs ofbeldis. Viðurkennt var að ekki hefði verið tekið á þeim málum með viðeigandi hætti . Stjórnendur báðust afsökunar á viðbrgögðum í opnu bréfi til nemenda.

Bréfið var birt var á vefsíðu skólans í gær.

„Við munum leggjast á eitt við að vinna vel úr þeim málum sem hafa verið tilkynnt til skólans og bregðast við í samræmi við áætlanir. Skólastjórnendur hafa tekið á móti tillögum nemenda um úrbætur og hvernig megi bæta ferlið þegar upp koma mál af ofangreindum toga,“ sagði í bréfinu.

Þá sagði að eftir fund stjórnenda í gær með fulltrúum Sambands íslenskra framhaldsskólanema, SÍF, hafi verið ákveðið að skólinn yrði einn af samstarfsaðilum þeirra í aðgerðum gegn kynferðislegri áreitni og kynferðislegu ofbeldi.

„SÍF er langt komið með áætlunina sem unnin er af þeirra sérfræðingum og við erum tilbúin í samstarf.“ 

SÍF sagði í tilkynningu í gær að sambandið væri langþreytt á aðgerðarleysi ráðherra. Ásmundur Einar væri fallinn á tíma. Sambandið væri í samstarfi við Sólborgu Guðbrandsdóttur og níu öðrum sérfræðingum að leggja drög að viðbragðsáætlun.

Tímabært að rödd framhaldsskólanema fái að heyrast 

Steinunn Gyðu- og Guðjónsdóttir talskona Stígamóta sagði í fréttum Stöðvar 2 á mánudag tímabært að rödd framhaldsskólanema fái að heyrast.

„Ég held að það sé allt í lagi að kalla þetta MeToo bylgju framhaldsskólanema. Á Stígamótum vitum við að kynferðisofbeldi beinist fyrst og fremst að ungu fólki. 70 prósent af þeim sem koma til okkar voru beitt ofbeldi fyrir 18 ára aldur. Þannig að ég held að þau séu bara að láta samfélagið og skólastjórnendur vita að í öllum framhaldsskólum eru brotaþolar kynferðisofbeldis. Og mjög líklegt að í öllum framhaldsskólum séu líka gerendur kynferðisofbeldis,“ sagði Steinunn.

Sem hluti af mótmælunum á mánudaginn voru fjölmörg karlmannsnöfn skrifuð á spegla í MH og þannig bendlaðir við kynferðislegt ofbeldi. Fréttastofa hefur upplýsingar um að aðstandendur einhverra þeirra drengja, sem segjast saklausir og telja hafa verið brotið á með því að skrifa nafn þeirra, sé með til skoðunar að leita réttar síns.