Varamennirnir björguðu stigi fyrir Tottenham í Skot­landi

Þetta hafa verið erfiðar vikur fyrir Tottenham og en liðið náði að bjarga stigi í Skotlandi í Evrópudeildinni í kvöld.

Svíinn Dejan Kulusevski jafnaði metin eftir stoðsendingu frá Dominic Solanke. Þeir komu báðir inn á sem varamenn í seinni hálfleiknum.

Jöfnunarmarkið kom fimmtán mínútum fyrir leikslok en hvorugu liðinu tókst að ná inn sigurmarki.

Marokkómaðurinn Hamza Igamane hafði komið Rangers í 1-0 á 47. mínútu eftir stoðsendingu frá James Tavernier.

Það er óhætt að segja að það sé farið að hitna undir knattspyrnustjóranum Ange Postecoglou enda er liðið án sigurs í fimm síðustu leikjum í öllum keppnum. Liðið vann frábæran sigur á Manchester City en síðan hefur lítið verið að frétta í stigaöflun liðsins.

Liðið er líka á hraðri niðurleið í töflunni í Evrópudeildinni.

Tottenham vann þrjá fyrstu leiki sína í Evrópudeildinni í vetur en hefur síðan aðeins fengið tvö stig út úr síðustu þremur leikjum. Liðið er í níunda sæti þegar tveir leikir eru eftir.

Lokaleikir Tottenham eru á móti þýska liðinu Hoffenheim og sænska liðinu Elfsborg.