Þurfum ljós á aðventunni

Kertagerð er göfugt og heillandi viðfangsefni. Um það er auðvelt að sannfærast þegar komið er í fyrirtækið Jöklaljós þar sem nostrað er við hvert og eitt kerti.

„Mín vinnsla er öll handunnin. Þar kemur engin vél nærri,“ segir Sólrún Anna sem stofnaði fyrirtækið sitt, Jöklaljós, fyrir tólf árum eftir að hafa lært handbragðið hinum megin við pollinn, nánar tiltekið í Danmörku. 

Sólveig segir áhugann á kertagerðinni óþrjótandi lind og það gildi reyndar um listsköpun almennt. 

„Hugmyndabankinn hjá mér er alltaf yfirfullur og ég anna ekki að vinna úr honum. Því verð ég stundum að bremsa mig af til að hafa líkama og heilsu í lagi. Ég er ekki vélmenni,“ segir hún brosandi.

Síðasta atriðið er líka auðséð á kertunum hennar því greinilega er nostrað við hvert og eitt.

Kúlulaga kerti steypir hún í mótum, straujar og sléttar og skreytir síðan með öðrum litum, gyllingum og silfri. 

Önnur eru máluð og enn önnur hefðbundin aflöng til að láta standa í stjökum. Hvernig sem lagið er þá eru kertin hugsuð sem birtugjafi sem gleður að sögn handverkskonunnar.

„Við þurfum öll á ljósum að halda núna,“ segir hún. 

Upphaflega var Sólrún Anna með kertagerðina heima hjá sér í Sandgerði en nú hefur hún komið sér vel fyrir í Grófinni í Reykjanesbæ, í nágrenni við Duushús og smábátahöfnina.

Þar sem langt er í næsta jökul af Reykjanesinu er Sólrún Anna innt eftir uppruna nafnsins Jöklaljós.

„Ég hef Snæfellsjökul fyrir augum þegar ég lít út um gluggann heima hjá mér í Sandgerði.

Ég tel orkuna sem frá honum stafar eitt af því sem fleytir mér áfram.“