Sannleikurinn: Blátt áfram fá áfram að hræða börn

Eitthvað fólk úti í bæ er enn að reyna komast inn í skólana með þau skilaboð til barna og foreldra þeirra að best sé að hræðast alla og gera ráð fyrir því að allir vilji brjóta á barninu þínu. Samtökin Blátt áfram hafa víða fengið að heimsækja skóla og stofnanir og þar sem samtökin koma er annar hver maður orðinn hugsanlegur barnaníðingur.

Blátt áfram hafa mátt sæta mikilli gagnrýni. Þau eru sögð bera mikla ábyrgð á því að margir þora ekki að vera góðir við annarra manna börn eða aðstoða þau. Enda vara samtökin við einstaklingum sem vilja barni vel og vilja aðstoða, því það er það sem vondu karlarnir gera.

Sigríður Björnsdóttir, framkvæmdastjóri blátt áfram, segir fólk ekki átta sig á því hversu lítið þurfi í raun að gera til að koma í veg fyrir kynferðisofbeldi.

„Gera bara ráð fyrir því að allir séu ógeð. Maki, afi og amma, vinir þínir, kennarar og sérstaklega fyrrverandi makar. Ekki leyfa neinum að vera einum með barninu þínu því þá ertu að bjóða hættunni heim.“

Samtökin eru með hræðsluáróðursherferð tilbúna sem mun fljótlega fara af stað en hún er hugsuð til að auðvelda fólki að sjá hið illa í öllum.

Sigríður segist kannast við gagnrýni. „Já við heyrum neikvæðar raddir. Það er eðlilegt því níðingarnir passa upp á sitt. Við erum að ýta við málaflokki sem fæstir vilja vita af. Sumir virðist vilja búa í samfélagi þar sem börn geta átt jákvæð samskipti við ættingja sína og jafnvel kennara. Sumum finnst meira að segja í lagi að tala við ókunnugt barn eða aðstoða. Ef fólk gæfi sér tækifæri og tíma til að kynna sér þetta þá myndi það átta sig á því að það er svo margt sem það veit ekki. Það er svo margt sem við sjáum ekki af því að við erum ekki með réttu gleraugun. Allir eru óvinurinn gleraugun. En þegar við erum komin með haldgóðar upplýsingar um það hverju við erum að leita að, þá sjáum við miklu meira. Og jafnvel vinalegur afi mun birtast sem ógeðslegt pervert sem sýnir velferð barnabarns síns óeðlilegan áhuga.“

„Óttinn er góður því það segir mér að fólk er að koma út úr afneitun. Og það er miklu meira um kynferðisofbeldi en við áttum okkur á. Við í Blátt áfram höfum því miður enga menntun á þessu sviði en við höfum viljann og nennuna til þess að hræða barnið þitt svo mikið að það mun aldrei treysta neinum aftur.“





Sannleikurinn rekur öfluga og óvæga fréttastofu þar sem engum er hlíft og ekkert mál er of stórt eða of lítið. Sannleikurinn er háður öllum stjórnmálaflokkum og hagsmunaaðilum. Fréttastofa Sannleikans hefur Facebook-síðu  en vinsamlegast ekki birtast þar með eitthvað væl.