Færeyingar taka að sér þyrluflug til olíuborpalls

Færeyska flugfélagið Atlantic Airways hefur eftir útboð tryggt sér samning við Statoil um að annast allt þyrluflug í tengslum við boranir norska olíufélagsins í lögsögu Færeyja á þessu ári. Atlantic Airways mun einnig annast flug með olíustarfsmenn á þotum félagsins til og frá Færeyjum í tengslum við olíuleitina. Það er Wall Street Journal sem greinir frá þessu.

Olíuboranirnar eiga að hefjast á öðrum fjórðungi þessa árs og er áætlað að þær standi yfir í fimm til átta mánuði. Atlantic Airways notar þyrlu af gerðinni Agusta Westland, AW-139, sem það leigir. Virði samningsins er áætlað 26-41 milljón danskra króna, eða sem nemur 550-870 milljónum íslenskra króna.

300 manna áhöfn fylgir borpallinum West Hercules, sem notaður verður. Flugfloti Færeyinga mun þannig annast áhafnaskiptin alla leið, flytja mannskapinn milli meginlands Evrópu og Færeyja og síðan milli borpalls og lands.

Atlantic Airways hefur notað þyrlur í innanlandsflugi milli færeysku eyjanna allt frá árinu 1994 og annast björgunarflug frá árinu 2001. Það hefur áður sinnt þyrluflugi til olíuborpalla við Færeyjar en einnig í Norðursjó í lögsögu Bretlands, Danmerkur og Hollands. Félagið rekur sem stendur tvær þyrlur  af gerðinni Bell 412, þrjár þotur af gerðinni Airbus A-319 og eina þotu af gerðinni Bae Avro RJ-100.

Olíubrunnarnir tveir sem Statoil ætlar að bora í ár verða dýrasta verkefni í atvinnusögu Færeyja. Kostnaður er talinn verða allt að fjörutíu milljarðar íslenskra króna. Áætlað er að af þeim renni fjórir til sex milljarðar króna beint inn í færeyskt samfélag í gegnum þjónustusamninga af því tagi sem Atlantic Airways hefur gert og með skatttekjum.