Rappkvennakvöld á Harlem

Já já já það er loksins komið að því, stóra stundin sem allir hafa beðið eftir er runnin upp. Reykjavíkurdætur halda rappkvennakvöld á Harlem kl. 21 annað kvöld (föstudagurinn 4. apríl), ekkert gjald.

Þið vitið hvað það þýðir, jafndúndur flottur flokkur hefur varla sést. Það muna allir eftir því þegar Reykjavíkurdætur sprengdu internetið með laginu „Reykjavíkurdætur". Facebook Reykjavíkurdætra má nálgast hér.

Hvernig byrjaði þetta allt saman? Nokkrar stelpur með brennandi áhuga á rappi tóku sig til og ákváðu að halda rappkvennakvöld á Bar 11 síðastliðið sumar. Eins og margir muna þá troðfylltist staðurinn. Fólk var beðið um að þjappa svo fleiri kæmust niður stigann og aðrir þurftu að snúa við því þau hreinlega komust ekki inn. Það er greinilega mikill áhugi á kvenkyns röppurum hér á landi. Rappkvennakvöldið fyllti fleiri stelpur innblæstri og hópurinn stækkaði. Rappkvennakvöld númer tvö var aftur haldið á Bar 11. Í þetta skiptið trylltust fjölmiðlar og vildu vera með í fjörinu. Kolfinna og Blær fóru í Kastljós og Blær sagði meðal annars nokkur dónaleg orð svo sem „fokk" og „sleiktu á mér fokking píkuna".  Í augum flestra varð hún stórstjarna eftir að hafa gert það sem ekki má gera.

Næst kom upp hugmyndin að skella saman í eitt lag, það var örlagarík ákvörðun. Þvílík framkvæmdargleði og listsköpun hefur sjaldan átt sér stað. Reykjavíkurdætur fylltust krafti og bjuggu til texta hver í sínu lagi. Næst hittust þær á laugardegi þar sem textabrotunum var raðað saman og farið í upptökuver. Daginn eftir var myndbandið tekið upp og það frumsýnt þremur dögum síðar. Meistaraverkið fæddist.



Nú hafa Reykjavíkurdætur gert annað meistaraverk, myndband og lagið Fiesta. Það er sjóðandi heitt eins og þið rétt getið ímyndað ykkur en Gnusi Yones gerði taktinn og við vitum öll hversu mikill tónsnillingur hann er. Helena Harsita Stefánsdóttir og Arnar Steinn Friðbjarnarson eru hæfileikaríkt par sem gerðu aftur myndbandið fyrir Reykjavíkurdætur. Myndbandið verður frumsýnt seinni partinn á morgun á Vísi.



Fiesta verður flutt a rappkvennakvöldinu á Harlem ásamt laginu „Reykjavíkurdætur". Þar að auki munu rappetturnar flytja lög sem þær hafa skapað hver í sínu horni. Þið sem hafið áður farið á rappkvennakvöld vitið hversu áhrifarík reynsla það er, ekki missa af þessu.