Gajić markakóngur HM í Katar | Heimamenn með tvo á topp 5

Slóveninn Dragan Gajić varð markakóngur HM 2015 í Katar. Þessi frábæri örvhenti hornamaður skoraði alls 71 mark í níu leikjum, eða 7,9 mörk að meðaltali í leik. Tuttugu og sjö af mörkunum hans komu af vítalínunni. Gajić nýtti skotin sín vel á mótinu en hann var með skotnýtingu upp á 76,3%.

Svartfellingurinn Žarko Marković, sem spilar með landsliði Katar, var í 2. sæti með 67 mörk, fjórum mörkum færri en Gajić. Þessi öfluga skytta skoraði 15 mörk úr vítaköstum en skotnýting hans var 52,8%.

Uwe Gensheimer, fyrirliði Þýskalands, var þriðji markahæsti leikmaður HM með 54 mörk, tveimur mörkum meira en Chile-maðurinn Rodrigo Salinas sem skoraði 52 mörk í aðeins sjö leikjum, eða 7,4 mörk að meðaltali í leik.

Kúbumaðurinn Rafael Capote, sem leikur, líkt og Marković, með landsliði Katar, var í 5. sæti á markalistanum með 48 mörk, Spánverjinn Valero Rivera var í 6. sæti með 47 mörk og Makedóninn Kiril Lazarov vermdi 7. sætið en hann skoraði 45 mörk í sex leikjum, eða 7,5 mörk að meðaltali í leik.

Guðjón Valur Sigurðsson var efstur íslensku leikmannanna á markalistanum. Landsliðsfyrirliðinn skoraði 31 mark í sex leikjum og var í 25.-29. sæti yfir markahæstu leikmenn mótsins.

Markahæstu leikmenn HM:

1. Dragan Gajić (SLóvenía) - 71 mark

2. Žarko Marković (Katar) - 67

3. Uwe Gensheimer (Þýskaland) - 54

4. Rodrigo Salinas (Chile) - 52

5. Rafael Capote (Katar) - 48

6. Valero Rivera (Spánn) - 47

7. Kiril Lazarov (Makedónía) - 45

8. Siarhei Rutenka (Hvíta-Rússland) - 43

9. Robert Weber (Austurríki) - 42

10. Ivan Čupić (Króatía) - 41

11. Mikkel Hansen (Danmörk) - 39

12. Federico Pizzaro (Argentína) - 37

13.-15. Patrick Groetzki (Þýskaland) - 36

13.-15. Michaël Guigou (Frakkland) - 36

13.-15. Michael Jurecki (Pólland) - 36