Dagar Honda S2000 taldir

Honda framleiddi hinn mjög svo aksturshæfa sportbíl S2000 á árunum 1999 til 2009 og allar götur síðan þá hafa bílaáhugamenn vonast til þess að Honda myndi aftur hefja framleiðslu á þessum skemmtilega litla en öfluga bíl aftur. Hefur Honda legið lengi undir feldi varðandi áframhaldandi framleiðslu hans.

Nú hefur Honda hinsvegar upplýst það að ekki standi til að endurvekja framleiðslu hans þar sem ekki sé næg eftirspurn eftir bílum eins og S2000 á tímum þar sem kaupendur fjárfesta í fáu öðru en jepplingum og jeppum. Slíkt sé of áhættusamt og nær ómögulegt að það skili Honda hagnaði.

Þrátt fyrir síminnkandi framboð smárra sportbíla eru ennþá framleiddir bílar eins og Mazda MX-5, Alfa Romeo 4C Spider, Porsche 718 Boxster, BMW Z4, Fiat 124 Spider og Nissan 370Z. Hvort afdrif þeirra verði með líkum hætti og með Honda S2000 nú skal ósagt látið, en fáir af þessum bílum seljast í mjög miklu magni og víst að framleiðendur þeirra hagnast ekki ýkja mikið á framleiðslu þeirra. Það gera þeir hinsvegar á flestum nýjum jepplingum.

Honda S2000 var í upphafi með mjög öfluga 2,0 lítra vél sem snérist allt að 8.800 snúningum. Seinna meir kom hann með 2,2 lítra vél með meira togi en lægri snúningshraða. Honda S2000 fékkst frá upphafi eingöngu með 6 gíra beinskiptingu, enda voru kaupendur hans yfirleitt miklir bílaáhugamenn sem kjósa sér gjarnan beinskipta sportbíla. Þyngdardreifing á milli öxla var frá upphafi 50/50 og bíllinn hefur ávallt þótt með allra aksturshæfustu sportbílum.

Í 2,0 lítra útgáfu S2000 var aflið 247 hestöfl og 2,2 útgáfan 239 hestöfl. Það verður að teljast heilmikið afl fyrir ekki þyngri bíl en 1.250 kíló, svo þarna var kominn afskaplega sprækur sportbíll sem unaður var að aka. Nú munu margir bílaáhugamenn sem kynnst hafa Honda S2000 gráta endanlegt brotthvarf hans.

Frá upphafi hefur Honda S2000 selst í 69.132 eintökum í N-Ameríku, 19.793 eintökum í Evrópu og 21.658 eintökum í Japan. Það gera samtals 110.583 eintök og vafalaust hafa einhver fleiri selst í öðrum heimshlutum, en á þessum 10 ára framleiðslutíma S2000 hefur framleiðslan ekki þurft að vera mikið meiri en 11.000 eintök á ári.