Oddvitaáskorunin: Með vasahníf á öryggisfundi

Vísir stendur fyrir Oddvitaáskoruninni 2018 þar sem skorað er á oddvita allra flokka í kjördæmum um land allt að taka þátt. Áskorunin felur í sér stutta kynningu og að svara nokkrum léttum spurningum.



Jón Snæbjörnsson leiðir lista Nýs afls í Bláskógabyggð í sveitarstjórnarkosningunum.

Ég er 40 ára, tveggja barna faðir búsettur í Eyvindartungu í Laugardal og uppalinn í Austurey í sömu sveit.

Menntun mín er á sviði byggingarverkfræði og menntun framhaldsskólakennara (viðbótardiplóma). Einnig hef ég stundað nám til B.A. gráðu í sagnfræði og vinn þar að lokaritgerð. Frá árinu 2016 hef ég að mestu unnið að kennslu við Menntaskólann að Laugarvatni en þar áður starfaði ég í 10 ár á verkfræðistofu í Reykjavík.

Í Eyvindartungu rekum við fjölskyldan fjárbú ásamt tveimur smávirkjunum er framleiða raforku til sölu á dreifikerfi RARIK. Einnig erum við að stíga okkar fyrstu skref í ferðaþjónustu.

Helsta stefnumál okkar er að gera góða byggð enn betri. Þar erum við m.a. að horfa til nútímavæðingar sveitarfélagsins og hugað sé vel að fræðslu- og uppeldismálum til framtíðar.

Hver er fallegasti staðurinn á Íslandi?

Heiðin heima. Ég var 6 ára er ég fór fyrst í smalamennsku á hestbaki heiðina heima með afa í Eyvindartungu. Og þangað leita ég reglulega í kyrrðina og fjölbreytilega náttúruna til að róa hugann og safna kröftum.

Hvar á Íslandi myndir þú helst vilja búa? (Fyrir utan eigið sveitarfélag)

Mjólkárvirkjun. Ég starfaði lengi að bæði endurbyggingu virkjunarinnar og að nýrri virkjun við Borgarhvilftarvatn. Þekki því svæðið vel og náttúru þess, það er eitthvað einstakt við Vestfirðina.

Hver er uppáhaldsmaturinn þinn?

Lambakótelettur í raspi hjá mömmu.

Hvaða mat ert þú bestu/ur að elda?

Ég er bestur í að baka eggjakökur.

Uppáhalds „guilty pleasure“ lag?

Hvolpasveitarlagið.

Hvað er það vandræðalegasta sem komið hefur fyrir þig, sem segja má frá?

Að vera með vasahníf, eftir öryggisleit á leiðtogafundi Jacques Chirac, Gerhard Schröder og Aleksander Kwasniewski á Place Stanislas í Nancy árið 2005.

Draumaferðalagið?

Að fara 100 ár aftur í tímann, er Ísland varð frjálst og fullvalda ríki. Upplifa sveitina mína og gamla bændasamfélagið, að eiga samtal við aldamótakynslóðina.

Trúir þú á líf eftir dauðann?

Nei.

Besti hrekkurinn sem þú hefur gert eða lent í?

Þegar Keli bróðir minn var steggjaður. Hann fór sem gamall bóndi á hestbaki um Laugarvatn og seldi silung er hékk bundinn um herðar hans og egg er hann hafði í heybeði ofan í plastfötu. Egg og silungur til sölu!

Hundar eða kettir?

Hundar.

Uppáhalds „guilty pleasure“ bíómynd?

Der schuh des Manitu. 

Hvaða leikari ætti að leika þig í bíómynd?

Nemendur mínir við Menntaskólanna að Laugarvatni. Þeir ná ótrúlega vel að leika alla mína sérviskutakta á árlegu kennaragríni.

Í hvaða Game of Thrones ætt værir þú og af hverju?

Ég væri nafni minn, Jon Snow. Hann er Stark ættaður.

Hefur þú verið tekin/n af lögreglunni?

Já, á einu sinni á Hellisheiðinni fyrir of hraðan akstur.

Uppáhalds tónlistarmaður?

Erfið spurning er ég kýs að svara ekki.

Uppáhalds bókin?

Bækur um sagnfræði eða vel skrifaðar ævisögur. Ég hef t.d. gaman af að lesa bækur Antony Beevor og er nú lesa norska útgáfu bókarinnar um seinna stríðið (n. Den andre verdenskrig).

Les einnig oft fréttir frá Noregi eða Þýskalandi til að halda við tungumálakunnáttunni.

Uppáhalds föstudagsdrykkur?

Rótsterkt kaffi árla morguns.

Uppáhalds þynnkumatur?

Niðursoðnir ávextir.

Þegar þú ferð í fríið, sólarströnd eða menning?

Menning.

Hefur þú pissað í sundlaug?

Já, líklega.

Hvaða lag kemur þér í gírinn?

Eftir námsár mitt í Þýskalandi þá er hlusta ég oft á þýska tónlist, t.d. Rammstein, Die Toten Hosen og Die Ärtzte, ef ég á að nefna eitt lag, þá er það Rosenrot með Rammstein.

Er eitthvað smávægilegt sem farið hefur í taugarnar á þér í þínu sveitarfélagi sem þú vilt laga?

Við byggjum undirgöng fyrir búfénað en ekki fyrir börnin okkar.

Á að banna flugelda?

Nei, en takmarka notkun þeirra.

Hvaða landsliðsmaður í knattspyrnu værir þú og af hverju?

Alfreð Finnbogason, mikill metnaður bæði fótboltalega og að læra ný tungumál.

Oddvitaáskorunin er hluti af kosningaumfjöllun Vísis. Öllum oddvitum á landinu býðst að taka þátt. Áhugasamir oddvitar geta verið í sambandi við [email protected].