Rýnt í stöðuna í Úkraínu: Komnir langt í gegnum varnir Rússa í Kharkív

Úkraínumenn eru taldir hafa sótt fram minnst tuttugu kílómetra inn í varnarlínur Rússa í Kharkív og rekið Rússa frá minnst fjögur hundruð ferkílómetrum, samkvæmt nýjustu skýrslu hugveitunnar Institute for the study of war. 

Rússar munu þó hafa sent liðsauka til svæðisins en ástand þeirra hersveita er enn óljóst og þykir líklegt að þær séu ekki fullbúnar hermönnum né hergögnum. Það eina sem Rússar hafa formlega sagt um sókn Úkraínumanna er að hún hafi verið stöðvuð, sem virðist ekki vera rétt.

Hér má sjá myndir sem sýna glögglega, í grófum dráttum þó, hvernig staðan hefur breyst á undanförnum dögum.

Fjölmargar myndir og myndbönd af rússneskum hermönnum í haldi Úkraínumanna hafa verið birtar á samfélagsmiðlum á síðustu dögum. Slíkar myndbirtingar brjóta gegn þrettándu grein Genfarsáttmálans.

Þrettánda greinin fjallar um að verja eigi stríðsfanga gegn ofbeldi, ógnunum og gegn smánun og forvitni almennings eins og það er orðað í sáttmálanum sem samþykktur var árið 1949.

Sjá einnig: Se­ag­al braut gegn Genf­ar­sátt­mál­an­um á her­numd­um svæð­um í Úkra­ín­u

Sókn Úkraínumanna í Kharkív-héraði ógnar birgðalínum Rússa í borginni Izyum, sem er ein af þungamiðjum herafla Rússlands í austurhluta landsins. Það virðist vera markmið Úkraínumanna að loka á þær birgðalínur og þá með því að ná borginni Kupyansk, sem er norður af Izyum og er notuð til birgðaflutninga til hersveita Rússa á svæðinu.

Úkraínumenn hafa undirbúið gagnsóknir víða í Úkraínu, með því markmiði að ná frumkvæðinu í átökunum við Rússa og þvinga Rússa til að bregðast við aðgerðum þeirra og þannig stjórna því hvar barist er og hvenær.

Vólódímír Selenskí, forseti Úkraínu, ræddi árangur úkraínskra hermanna í ávarpi sínu til þjóðarinnar í gærkvöldi. Hann vildi ekki nefna frelsaða bæi og sagði það of snemmt, samkvæmt frétt BBC, en ráðamenn í Úkraínu hafa varist allra fregna af gagnárásum Úkraínumanna gegn Rússum og meinað blaðamönnum aðgang að hersveitunum í Kherson.

Selenskí sagði þó að mikilvægur árangur hefði náðst og að Úkraínumenn ættu að vera stoltir af hermönnum sínum.

Sóknin í Kherson kostnaðarsöm

Washington Post birti í gær grein þar sem rætt var við úkraínska hermenn sem höfðu særst á vígvellinum í Kherson. Þeir sögðu blaðamanni WP að Rússar hefðu mikla yfirburði varðandi stórskotalið og það hefði reynst Úkraínumönnum verulega erfitt.

Þeir væru að missa fimm menn fyrir hvern Rússa sem væri felldur.

Sjá einnig: Árang­ur­inn í suðr­i dýr­keypt­ur Úkra­ín­u­mönn­um

Hermennirnir sem rætt var við sögðu þó ekkert annað í boði en að reka Rússa á brott.

„Ef við stöðvum þá ekki, munu þeir bara nauðga og myrða fólkið okkar, eins og þeir hafa gert alls staðar annars staðar,“ sagði einn hermannanna. Hann sagði að þó sóknin Kherson væri kostnaðarsöm gætu Úkraínumenn unnið.

Sagðir vilja einangra bestu hermenn Rússa

Fregnir hafa borist af því að Rússar hafi sent sína reyndustu og best þjálfuðu hersveitir til Kherson en það eru hermenn sem Úkraínumenn eru að reyna að króa af. Þeir vilja forðast að ráðast beint á víggirta varnarlínu Rússa og reyna þess í stað að grafa undan birgðaneti þeirra og einangra alla rússneska hermenn á vesturbakka Dnipro.

Úkraínumenn hafa skemmt eða eyðilagt allar brýr yfir ána og gera árásir á ferjur Rússa og flotbrýr sem þeir reyna að gera yfir ána.

Talsmenn varnarmálaráðuneytis Bandaríkjanna sögðu í gærkvöldi að þær sæju hægan en stöðugan og markvissan árangur hjá Úkraínumönnum í Kherson. Það væri enn stutt síðan sóknin þar hófst en hún liti ágætlega út, samkvæmt frétt Reuters.

Samþykkja enn eina vopnasendinguna

Lloyd J. Austin, varnarmálaráðherra Bandaríkjanna, tilkynnti í morgun að Joe Biden, forseti, hefði samþykkt 675 milljóna dala vopnasendingu til Úkraínu. Sendingin inniheldur skotvopn, farartæki og vopn sem ætluð eru gegn skrið- og bryndrekum.

Þetta sagði Austin við upphaf fundar bandamanna Úkraínu í Ramstein í Þýskalandi. Á fundinum stendur til að ræða hvernig ríkin geta aðstoðað Úkraínumenn frekar og styrkt varnir ríkisins.

Þá er Antony Blinken, utanríkisráðherra Bandaríkjanna, nú staddur í Kænugarði í óvæntri heimsókn til Úkraínu. Með því vilja Bandaríkjamenn sýna Úkraínumönnum stuðning.

Norðmenn tilkynntu einnig í morgun að þeir ætluðu að gefa Úkraínumönnum 160 Hellfire-eldflaugar og nætursjónauka.

Flytja fólk á brott í aðdraganda innlimunar

Ráðamenn í Bandaríkjunum sökuðu í morgun Rússa um að flytja allt að 1,6 milljónir Úkraínumanna nauðarflutningum til Rússlands. Þar hafi fólkið þurft að fara í gegnum svokallaðar „síunarbúðir“. þar sem þau eru yfirheyrð, fjölskyldumeðlimir eru aðskildir og fólk fangelsað.

Linda Thomas Greenfield, sendiherra Bandaríkjanna hjá Sameinuðu þjóðunum, sagði á fundi öryggisráðsins að þúsundir barna hefðu farið í gegnum þessar búðir og einhver þeirra hefðu verið tekin frá foreldrum og gefin til rússneskra hjóna.

Greenfield sagði samkvæmt frétt New York Times að með þessu vildu ráðamenn í Rússlandi reyna að réttlæta innlimun úkraínsks landsvæðis. Hún sagði þó að raunverulega væru þetta einfaldlega stríðsglæpir.