Ástin á götunni

Ronaldo meiddur á ökkla

Cristiano Ronaldo, leikmaður Manchester United, leikur ekki með landsliði sínu, Portúgal gegn Egyptum á miðvikudag vegna ökklameiðsla. Ronaldo missti af leik United gegn Everton vegna sömu meiðsla en verður líklega með United gegn Aston Villa næsta laugardag. Í stað Ronaldos var Luis Boa Morte,leikmaður Fulham valinn í landsliðið.

Sport 13.10.2005 19:42

Ólafur og Hannes líklega ekki með

Ólíklegt er að Ólafur Bjarnason og Hannes Þ. Sigurðsson leiki með íslenska landsliðinu gegn Suður-Afríkumönnum í vináttuleik í knattspyrnu á Laugardalsvellinum á morgun. Þeir eru báðir meiddir og Ólafur líklega með rifinn liðþófa. Ásgeir Sigurvinsson landsliðsþjálfari reiknar með því að leyfa sem flestum leikmönnum að spreyta sig annað kvöld.

Sport 13.10.2005 19:42

Fish búinn að leggja árar í bát

Mark Fish, fyrrum fyrirliði Suður Afríska landsliðsins í knattspyrnu er hættur knattspyrnuiðkunnar vegna þrálátra hnémeiðsla. Fish,31árs lék með Bolton og Charlton í ensku úrvalsdeildinni en var síðast hjá Ipswich í ensku Championship deildinni.

Sport 13.10.2005 19:42

Ósáttur við Mikka Mús leiki

Graeame Souness, knattspyrnustjóri Newcastle er ekki sáttur við vináttulandsleikina sem eru spilaðir í þessari viku. "Þetta eru Mikka Mús leikir sem skipta engu máli og nú þegar ég vil vinna með mína menn á æfingavellinum eru sex eða sjö leikmenn fjarverandi. Spurðu hvaða knattspyrnustjóra sem er, allir eru ósáttir," sagði Souness.

Sport 13.10.2005 19:42

Sölunni á Essien seinkar enn

Forráðamenn Lyon náðu ekki að senda samningsdrög til Chelsea í tæka tíð til að ganga frá félagsskiptum Mickael Essien og því verður það ekki fyrr en á morgun sem gengið verður frá kaupunum.

Sport 13.10.2005 19:41

Nakata til Bolton

Japanski knattspyrnumaðurinn Hidetoshi Nakata hefur verið lánaður frá Fiorentina á Ítalíu til enska úrvalsdeildarliðsins Bolton.

Sport 13.10.2005 19:41

Halvorsen hættir með Sundsvall

Norski þjálfarinn Jan Halvor Halvorsen hjá sænska úrvalsdeildarliðinu Sundsvall hætti í gær störfum daginn eftir að lið hans var kjöldregið af Halmstad. Eyjamaðurinn Gunnar Heiðar Þorvaldsson skoraði þrennu þegar Halmstad vann Sundsvall 6-0 í fyrrakvöld. Halvorsen fór til Sundsvall í fyrra frá norska liðinu Sogndal og skrifaði þá undir þriggja ára samning.

Sport 13.10.2005 19:42

Buffon frá í átta vikur

Gianlugi Buffon, markvörður Juventus og ítalska landsliðsins er meiddur og mun því missa af upphafi leiktíðarinnar. Buffon fór úr axlarlið í leik gegn A.C. Milan um helgina og verður frá keppni í 8 vikur.

Sport 13.10.2005 19:41

Mourinho ósáttur við sjálfan sig

Jose Mourinho, knattspyrnustjóri Chelsea náði ekki upp í nefið á sér af óánægju með leik liðs síns í sigrinum á Wigan í gær og sagðist axla ábyrgðina sjálfur.

Sport 13.10.2005 19:41

AC Milan vann Berlusconi-bikarinn

AC Milan sigraði Juventus 2-1 í Berlusconi-bikarnum í fótbolta í gær. Patrick Viera kom Juventus yfir en Brasilíumennirnir Kaka og Serginho skoruðu fyrir AC Milan. Tveir leikmenn Juventus fóru meiddir af velli, Pavel Nedved og Gianluigi Buffon. Ítalska úrvalsdeildin hefst eftir hálfan mánuð.

Sport 13.10.2005 19:41

Hermann kominn með nýtt númer

Hermann Hreiðarsson, landsliðsmaður í knattspyrnu er búinn að skipta um númer hjá Charlton, Hermann sem hefur verið númer 12 síðustu leiktíðir er kominn í treyju númer 3 sem er hið eina sanna númer vinstri bakvarðar. Hermann verður ekki með landsliðinu sem mætir Suður Afríku á miðvikudag á Laugardalsvelli, landsliðsþjálfararnir gáfu honum frí.

Sport 13.10.2005 19:41

Hodgson þjálfar Finna

Englendingurinn Roy Hodgson þjálfari norska úrvalsdeildarliðsins Viking, hefur verið ráðinn landsliðsþjálfari Finna frá og með haustinu 2006. Hodgson er reyndur þjálfari sem víða hefur komið við á ferli sínum og meðal annars hefur hann þjálfað Inter Mílan, Udinese, Blackburn og FC Kaupmannahöfn.

Sport 13.10.2005 19:41

Arnar Þór skoraði gegn Mouscron

Í belgíska fótboltanum skoraði Arnar Þór Viðarsson annað mark Lokeren í 2-0 sigri á Mouscron. Gunther Van Handenhoven skoraði seinna markið eftir sendingu Arnars Grétarssonar.

Sport 13.10.2005 19:41

Lamb flæmdi Zenden frá Boro

Hollenski miðjumaðurinn Bundewijn Zenden segir að stjórnarformaður Middlesbrough, Keith Lamb, hafi verið ástæðan fyrir því að leikmaðurinn kaus að ganga til liðs við Liverpool í stað þess að vera áfram hjá Boro.

Sport 13.10.2005 19:41

Mörkin í símann

Allir GSM viðskiptavinir Og Vodafone eiga nú kost á því að skoða mörkin úr ensku úrvalsdeildinni og Meistaradeild Evrópu á þessu keppnistímabili. Þjónustan gefur knattspyrnuáhugamönnum tækifæri að fá send myndskeið af mörkum úr leikjum í Meistaradeildinni og ensku úrvalsdeildinni í símann fáeinum andartökum eftir að þau eru skoruð. 

Sport 13.10.2005 19:41

Wenger hrósar van Persie

Arsene Wenger hrósaði sóknarmanni sínum Robin van Persie eftir að varamaðurinn skoraði mark á móti Newcastle í 2-0 sigri Arsenal í gær, en sagðist viss um að Newcastle liðið ætti eftir að verða sterkt í vetur.

Sport 13.10.2005 19:41

Rautt verður gullt

Steve Bennet dómarinn sem rak Jermaine Jenas af velli í leik Arsenal og Newcastle hefur ákveðið að breyta rauða spjaldinu sem hann gaf Jenas í gullt spjald og því þarf leikmaðurinn ekki að fara í þriggja leikja bann.

Sport 13.10.2005 19:41

Ellington til WBA

Nathan Ellington er genginn til liðs við WBA frá Wigan fyrir 3 milljónir punda. Ellington, 24 ára er mikill markaskorari og gerði 59 mörk í 134 deildarleikjum fyrir Wigan. Kaupverðið nam 3 milljónum punda.

Sport 13.10.2005 19:41

Áttunda mark Ásthildar í Svíþjóð

Ásthildur Helgadóttir skoraði fyrir Malmö í sænsku úrvalsdeildinni þegar liðið sigraði Sunnanå 3-2. Umeå og Malmö eru efst í deildinni með 37 stig úr 13 leikjum. Ásthildur er búin að skora 8 mörk í deildinni.

Sport 13.10.2005 19:41

Enska landsliðið sem mætir Dönum

Andy Johnson, leikmaður Crystal Palace í ensku Championship deildinni, hefur þurft að draga sig úr landsliðshópi Englendinga sem mæta Dönum á Parken á miðvikudag í vináttulandsleik. Í hans stað hefur Sven Göran Erikson, landsliðsþjálfari Englendinga valið Darren Bent leikmann Charlton. 

Sport 13.10.2005 19:41

Arsenal sigraði Newcastle

Arsenal sigraði Newcastle 2-0 í ensku úrvalsdeildinni á heimavelli sínum Highbury. Mörk Arsenal komu á síðustu tíu mínútum leiksins, fyrst skoraði Thierry Henry úr vítaspyrnu á 81. mínútu og sjö mínútum síðar bætti Robin van Persie við marki fyrir Arsenal. Jermaine Jenas, leikmanni Newcastle var vikið af leikvelli í fyrri hálfleik.

Sport 13.10.2005 19:41

Essien til Chelsea

Michael Essien gengur á morgun til liðs við Englandsmeistara Chelsea frá franska liðinu Lyon. Talið er að Chelsea greiði 28 milljónir punda fyrir þennan 22 ára gamla miðvallarleikmann frá Gana. 

Sport 13.10.2005 19:41

Eiður Smári í byrjunarliðinu

Eiður Smári Guðjohnsen er í byrjunarliði Chelsea sem er að leika við Wigan í ensku úrvalsdeildinni. Eiður er fremstur á miðjunni í leikkerfinu 4-3-3.

Sport 13.10.2005 19:41

Botnslagur í 1. deild

Það var einn leikur á dagskrá í 1. deild karla í knattspyrnu í gær. Fjölnir og Völsungur frá Húsavík gerðu jafntefli 1 - 1 í botnbaráttunni. Hermann Aðalgeirsson kom Völsungum yfir en Tómas Leifsson jafnaði leikinn fyrir Fjölni. Völsungar eru í áttunda sæti í deildinni með 13. stig og Fjölnir í því níunda einnig með 13 stig.

Sport 13.10.2005 19:41

Stefán sigraði í Íslendingaslagnum

Stefán Gíslason og félagar í Lyn sigruðu Hannes Sigurðsson og félaga í Viking á heimavelli 2-1 í norku úrvalsdeildinni. Brann lið þeirra Ólafs Bjarnasonar og Kristjáns Sigurðssonar tapaði fyrir Bodo Glimt 2-1. Í þriðja leik dagsins sigraði Tromsö lið Molde 2-1.

Sport 13.10.2005 19:41

Meistaraheppni Chelsea

Hernan Crespo skoraði sigurmark Chelsea þegar venjulegum leiktíma var lokið í 1-0 sigri Englandsmeistaranna á Wigan. Óhætt er að segja að markið hafi verið af dýrari gerðinni, vinstri fótar skot utan teigs beint í eftri 90 gráðurnar. Eiður Smári fór meiddir af leikvelli í hálfleik.

Sport 13.10.2005 19:41

Gunnar Heiðar með þrennu

Gunnar Heiðar Þorvaldsson gerði þrennu mörk fyrir Halmstad í sænsku úrvalsdeildinni, sem burstaði botnliðið Sundsvall 6-0. Gunnar Heiðar er fjórði markahæsti leikmaður deildarinnar með 9 mörk. Djurgården endurheimti efsta sætið, þegar liðið lagði Gefle á útivelli 3-1. Kári Árnason lék fyrstu 54 mín. í liði Djurgården

Sport 13.10.2005 19:41

United sigraði opnunarleikinn

Manchester United sigraði Everton 2-0 í opnunarleik ensku úrvalsdeildarinnar í knattspyrnu sem lauk rétt í þessu. Mörk United gerðu þeir Ruud van Nistelrooy á 43. mínútu og fyrrum Everton leikmaðurinn, Wayne Rooney.

Sport 13.10.2005 19:40

Úrslit fyrstu deildar 12 ágúst

Þrír leikir voru á dagskrá í 1. deild karla í knattspyrnu í gær. HK og Víkingur gerðu markalaust jafntefli í Kópavogi. KA gerði góða ferð á Siglufjörð og burstaði KS , 5 - 0. Pálmi Rafn Pálmason fór á kostum í liði KA og skoraði þrennu og þeir Hreinn Hringsson og Jóhann Þórhallsson skoruðu sitt hvort markið. Þór vann Hauka , 2 - 0 , á Akureyri. Þórður Halldórsson og Hlynur Birgisson skoruðu mörk Þórs.

Sport 13.10.2005 19:40

Frábær sigur Bayern

Bayern München vann frábæran sigur á Bayer Leverkusen 5-2 á útivelli í þýsku úrvalsdeildinni. Roy Makaay gerði þrennu fyrir Bayern og þeir Michael Ballack og Íraninn  Karimi eitt hvor. Búlgarinn Dimitar Berbatov og Babic gerðu mörk Leverkusen. Úrslit annara leikja...

Sport 13.10.2005 19:41