Sannleikurinn: Sölvi með næstum fimmtíu ketti heima hjá sér

Lögreglan á höfuðborgarsvæðinu heimsótti nýverið heimili í umdæminu í kjölfar þess að kvartanir höfðu borist vegna kattahalds þar og óþrifnaðar sem af dýrahaldinu hlytist. Eigandi íbúðarinnar reyndist vera Sölvi Tryggvason fjölmiðlamaður.

„Ég viðurkenni að ég hef gaman af kisum en það er bara fallegt. Fólk hefur verri fíknir en þetta,“ segir rithöfundurinn og fjölmiðlamaðurinn Sölvi Tryggvason.

Sölvi er stoltur kattaeigandi og á næstum 50 ketti sem hann hugsar um af alúð. Ekki eru nema tvö ár síðan áhugi Sölva á ferfætlingunum krúttlegu kviknaði, en hann hefur verið iðinn við að bæta í safnið. Sölvi er einmitt nýkominn heim frá Marokkó þar sem hann fjárfesti í tveimur fágætum kisum í viðbót. „Það var ekki vegna þess að mig vantaði ketti. Annar er ljósbrún með munstri á tánni sem mig hefur dreymt um að eignast lengi. Hann passar bæði við sófasettið í stofunni og handklæðin inni á gestabaði en það er mikill kostur,“ segir Sölvi sem kennir starfi sínu í fjölmiðlum um kattadelluna.

„Þar fattaði ég hvað manneskjan er mikill drullusokkur og skiptir engu máli. Það er afar vont að vinna mikið með fólki. Það bara gengur ekki, þá eru kisurnar betri félagsskapur“ segir Sölvi en bætir við að einnig séu ákveðin fræði á bak við það að halda 50 ketti án þess að allt fari í hund og kött.

Sölvi vandar sig þegar hann velur nýjan kött. Hann segir íslenska karlmenn hugsa of lítið um dýr, en hefur fundið fyrir auknum áhuga hins kynsins eftir að hann fór að spá í kisum og safna þeim. „Karlarnir fatta bara ekki hversu miklu máli þetta skiptir. Ég var reyndar í bænum um helgina og þá var ég þrisvar sinnum spurður hvort þetta væri í alvörunni síamskettlingur í handtöskunni minni en ég tek því sem miklu hrósi fyrir mig.“

Sölvi er með mörg járn í eldinum þessa dagana. Hann er að selja fötin sín í Kolaportinu um helgar og vinnur að nýrri þáttaröð af fréttaskýringaþættinum Mjálminu sem verða á dagskrá á Skjá einum í vetur. 





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  þar sem sætum kisumyndum er hrúgað inn daglega.