Musk vill takmarka kannanir við áskrifendur Twitter

Þetta sagði Musk í tístþræði manns sem heitir Kim Dotcom.

Kim Dotcom, sem fæddist í Þýskalandi árið 1974 og hét Kim Schmitz, stofnaði skráarskiptasíðunnar Megaupload, á árum áður. Hann hefur lengi verið eftirlýstur í Bandaríkjunum vegna þessa en hann hefur haldið til á Nýja-Sjálandi undanfarin ár. Þar hefur hann staðið í baráttu gegn því að verða framseldur til Bandaríkjanna.

Á samfélagsmiðlum eins og Twitter lýsir Kim stjórnmálaskoðunum sem flokka má sem fjar-hægri og virðist hann aðhyllast ýmsum samsæriskenningum.

Hann skrifaði í gær tíst um að Musk gæti notað könnunina um það hvort hann ætti að hætta sem forstjóri Twitter til „hreinsunar“ á samfélagsmiðlinum. Það væri ekki sniðugt að halda opna könnun sem þessa þegar Musk væri helsti óvinur „djúpríkisins“ svokallaða.

Kim sagði Musk geta hent út „bottum“ sem hefðu tekið þátt í könnuninni og framkvæmt hana aftur.

„Áhugavert,“ svaraði Musk.

Annar maður sagði þá að eingöngu áskrifendur ættu að fá að taka þátt í könnunum sem snúa að stefnubreytingum á Twitter.

„Góður punktur,“ sagði Musk. „Twitter mun gera þessa breytingu.“

Þetta var meðal fyrstu tísta Musks eftir að könnuninni lauk. Skömmu áður hafði mikill meirihluti þátttakenda í könnun Musks sagt að hann ætti að stíga til hliðar sem forstjóri samfélagsmiðlafyrirtækisins sem hann var þvingaður til að kaupa í haust.

Sjá einnig: Blæs til skoðana­könnunar um hvort hann eigi að hætta

57,5 prósent þeirra rúmlega 17,5 milljóna sem tóku þátt í könnuninni sögðu að Musk ætti að stíga til hliðar. Hann sagðist ætla að fylgja niðurstöðum könnunarinnar en hefur ekki staðfest það eftir að könnuninni lauk.

Hann hafði einnig sagt að héðan í frá yrðu gerðar kannanir um allar helstu stefnubreytingar hjá Twitter. Það  var eftir að hætt var við að banna notendum Twitter að vísa á aðra samfélagsmiðla.

Í öðru tísti í nótt sagði Musk vangaveltur um fjölda svokallaðra botta í könnuninni einnig vera „áhugaverðar“. Bottar eru í stuttu máli sjálfvirkir Twitter-reikningar sem notaðir eru til að dreifa tístum í miklu magni. Flestir þeirra eru notaðir til að dreifa klámi eða upplýsingum um rafmyntir.

Áskriftarþjónustan opnuð aftur

Áskriftarþjónusta Twitter var opnuð á nýjan leik fyrr í þessum mánuði. Hún gerir notendum kleift að greiða átta eða ellefu dali fyrir blátt merki sem áður táknaði að starfsmenn Twitter ábyrgðust að viðkomandi reikningur væri raunverulegur.

Það olli mikilli óreiðu á Twitter fyrst þegar áskriftarþjónustan fór í loftið en notendur notuðu hana í massavís til að þykjast vera annað fólk og jafnvel fyrirtæki.

Sjá einnig: Óreiðan virðist ráða ríkjum hjá Twitter

Fyrirtæki og stofnanir munu fá annarskonar merki sem tákna eiga að um raunverulega reikninga er að ræða.

Óreiða hefur einkennt yfirtöku Musks. Stórum hluta starfsmanna Twitter hefur verið sagt upp og þar á meðal flestum yfirmönnum fyrirtækisins, auglýsendur hafa dregið saman seglin á samfélagsmiðlunum og hann sjálfur hefur hringlað fram og til baka með ýmsar ákvarðanir en einnig verið með puttana sjálfur í hvernig efni sem birtist á Twitter er stýrt.

Musk hefur varið miklu púðri í niðurskurð og leit að nýjum tekjuleiðum, eins og áðurnefndri áskriftarþjónustu. Hann keypti Twitter fyrir 44 milljarða dala en við yfirtöku hans stigmögnuðust skuldir fyrirtækisins og vaxtagreiðslur munu samkvæmt greinendum fara úr um 51 milljón dala árið 2021 í rúman milljarð dala á næsta ári.

Sjá einnig: Skuldir Twitter stigmagnast við yfirtöku Musks

Nýverið bárust fregnir af því að Twitter væri hætt að borga leigu af skrifstofuhúsnæði fyrirtækisins víðsvegar um heiminn og einnig væri verið að skoða að greiða ekki uppsagnarfrest fólks sem hefur verið sagt upp.