Góm­sæt mat­reiðslu­bók frá Hel­vítis kokkinum

Í lok síðasta ár setti hann, ásamt eiginkonu sinni Þóreyju Hafliðadóttur, á markað úrval af bragðgóðum eldpiparsultum sem hafa fengið mjög góðar viðtökur og í síðustu viku kom út fyrsta matreiðslubókin frá honum sem ber einfaldlega nafnið Helvítis matreiðslubókin.

Í þáttunum sínum hefur Ívar lagt áherslu á að elda bragðgóðan mat á mannamáli og það hefur svo sannarlega skilað sér í nýju bókinni hans.

„Í bókinni má finna margar gómsætar og einfaldar uppskriftir, einlægar eldhússögur og hagnýt ráð,“ segir Ívar. „Markmið okkar var að setja upp skemmtilega og auðlesna matreiðslubók fyrir alla. Hvort sem lesandinn er byrjandi eða reyndur kokkur þá ætti hann að geta fundið eitthvað fyrir sig í Helvítis matreiðslubókinni. Bókin okkar er öðruvísi en aðrar matreiðslubækur að því leyti að lesandinn getur sjálfur raðað saman máltíðinni sinni. Ef þú elskar bragðgóðan og einfaldan mat þá er þessi bók fyrir þig.“

Bókabeitan gefur bókina út og Karl Petersson tók allar myndir sem eru í bókinni.

Helvítis kokkurinn mætti í Brennsluna á FM957 fyrr í þessum mánuði og ræddi við þau Rikka G, Kristínu Ruth og Egil Ploder um nýju matreiðslubókina. Viðtalið byrjar á 1:05:30.

Ívar er matreiðslumaður að mennt með aldarfjórðungs reynslu úr veitingageiranum. „Ég hef starfað sem einkakokkur, á veitingahúsum og hótelum víðsvegar um landið. Ég kem til dyranna eins og ég er klæddur og er óhræddur við að vera mannlegur eins og sést vel í þáttunum mínum. Þórey eiginkona mín er margmiðlunarhönnuður og sá um hönnun og umbrotið á bókinni ásamt því að hanna allar sultu-umbúðirnar. Hún á auðvitað stóran þátt í þessu Helvítis ævintýri mínu.“

Hann hefur undanfarin ár starfað sjálfstætt sem einkakokkur, rekið Helvítis veisluþjónustuna, framleitt Helvítis eldpiparsulturnar ásamt Þóreyju, boðið upp á einka matreiðslu fyrir vandláta ásamt ýmsum öðrum verkefnum. „Nafnið „Helvítis kokkurinn“ kemur frá þeim tíma sem ég var að læra kokkinn. Nokkrir vinir mínir byrjuðu að nota gælunafnið „Kokkurinn“ sem þróaðist svo út í „Helvítis kokkurinn“. Þessir sömu vinir mínir nota nafnið enn í dag og ég er meira að segja búinn að láta skrásetja það sem mitt eigið vörumerki.“

Helvítis eldpiparsulturnar fást núna í 20 verslunum um allt land og eru að fá frábærar viðtökur að sögn Ívars. „Það er gaman að segja frá því að eldpipar undiraldan er alltaf að stækka. Í vor er von á einni viðbót sem inniheldur íslenskt brennivín. Við erum viss um að fólk eigi eftir að flykkjast í verslanirnar til að smakka þessa frábæru nýju lúxusvöru en við gefum ekki meira upp að sinni.“

Í tilefni útgáfu Helvítis matreiðslubókarinnar verður blásið til útgáfuhófs á Kaffi Flóru í Grasagarðinum í Reykjavík, fimmtudaginn 23. nóvember kl. 18. Þar verður m.a. hægt að kaupa bókina á sérstöku útgáfutilboði og fá hana áritaða af Helvítis kokkinum. Óvæntir glaðningar verða í boði, ljúffengir drykkir frá Ölgerðinni og léttar veitingar í anda matreiðslubókarinnar.

Helvítis kokkurinn gefur hér eina uppskrift úr bókinni.

Rauðvíns lambalæri

Heiðalæri á beini

300 ml rauðvín

Salt

Svartur pipar

Aðferð:

Stillið ofninn á 180°C.

Hellið rauðvíni í steikarpott. Kryddið læri með salt og pipar og leggið í steikarpottinn.

Gott er að nota kjarnhitamæli í þessari uppskrift. Setjið lokið á og steikið í ofni í 90 mínútur eða þangað til kjarnhiti hefur náð 63°C. Hvílið lærið í 30 mínútur áður en það er skorið og borið fram.

Ef ekki er til kjarnhitamælir þá er til önnur nokkuð skotheld aðferð við þetta. Stillið ofninn á 180°C og steikið lambalærið í klukkutíma með lokið á. Hækkið svo hitann í 220°C, takið lokið af og steikið í 15 mínútur í viðbót.