Já­kvæð á­hrif Freys ber­sýni­leg: „Hef aldrei séð svona áður“

Freyr var keyptur til fall­bar­áttu­liðs KV Kortijk í belgísku úr­vals­deildinni frá danska liðinu Lyng­by í upp­hafi árs. Þá hafði liðið ekki unnið leik í deildinni síðan 21.októ­ber á síðasta ári. Kortijk vann sinn fyrsta leik undir stjórn Freysa og síðan þá hefur liðið leikið þrjá leiki og ekki tapað neinum þeirra.

Belgíski blaða­maðurinn Imar Vand­ena­beele sem starfar hjá HLN, stærsta fjöl­miðli Belgíu, hefur fylgst náið með gangi mála hjá KV Kortrijk undan­farin þrjú ár og hann tekur eftir miklum breytingum hjá liðinu eftir komu Freys.

„Freyr hefur breytt miklu nú þegar fyrir KV Kortrijk. Liðið var að­eins með tíu stig eftir tuttugu leiki í deildinni þegar að hann tók. Nú eftir fjóra leiki undir stjórn Freys hefur liðið sótt í átta stig af tólf mögu­legum. Stærstu breytingarnar varða samt sem áður kannski ekki skipun leik­manna­hópsins eða leik­skipu­lagið sjálft. Heldur hugar­farið sem er ríkjandi innan liðsins. Þar hafa stóru breytingarnar átt sér stað.“

Krafta­verk í upp­siglingu?

Kortrijk vann í gær mikil­vægan 1-0 sigur á Charleroi í fyrra­dag og þrátt fyrir að vera enn á botni deildarinnar er út­litið orðið tölu­vert bjartara fyrir liðið nú þegar að sex um­ferðir eru eftir af hinni hefð­bundnu deildar­keppni og vonast stuðnings­menn fé­lagsins eftir því að á­líka krafta­verk sé í upp­siglingu og Freyr fram­kvæmdi hjá Lyng­by á sínum tíma, að bjarga liðinu frá falli.

„Fyrir komu Freys leit þetta oft á tíðum þannig út að það virtist ekki skipta leik­menn máli að vinna leiki. Auð­vitað er skrýtið að segja það en þetta leit þannig út. Þetta voru mjög erfiðir tímar fyrir fé­lagið. Næstum allir leikir töpuðust og nær allir voru sann­færðir um að liðið yrði fall­byssu­fóður í belgísku úr­vals­deildinni.

En undan­farnar vikur hafa orðið til þess að sú orð­ræða er farin að breytast. Það er ein­hver orka í kringum fé­lagið og ég tel það alveg ger­legt að það bjargi sér frá falli. Ég var ekki á því máli fyrir nokkrum vikum. Ég taldi liðið ekki eiga mögu­leika á því að halda sæti sínu í deildinni. Núna sér maður bar­áttu hugar­far. Lið­sandinn er mikill og viljinn til þess að vinna leiki er til staðar.“

Freyr fékk á upp­hafs­dögunum í starfi tæki­færi til þess að breikka leik­manna­hóp Kortrijk í ný­af­stöðnum fé­lags­skipta­glugga í janúar og nefnir Imar þar helst komu japönsku varnar­mannanna Ryotaro Tsunoda og Haru­ya Fujii sem hafa komið af krafti inn í liðið.

Ís­lenska hugar­farið

Imar segir Frey ekki breytt of miklu hvað leik­skipu­lag Kortrijk varðar.

„Hann gerði nokkrar taktískar ­breytingar með 3-5-2-kerfinu og það gengur mjög vel upp. Þeir eru með fram­herja, Feli­pe A­venatti, sem var úti í kuldanum hjá fyrr­verandi stjóra Kortrijk. Fyrri þjálfari notaði hann ekki en Freyr notaði hann og sagði hann vera mikil­vægasta leik­manninn. Hann hefur staðið sig mjög vel í síðustu tveimur leikjum. Þetta er lík­lega stærsta breytingin en hann nýtur trausts leik­manna og hefur breytt flestu í tengslum við fé­lagið.

Ég tek til að mynda eftir því að hugar­far leik­manna hefur breyst til muna. Þetta er ís­lenska hugar­farið sem felst í vinnu­semi innan sem utan vallar. Breytingin á hugar­farinu skipti miklu máli. Kortrijk er nánast nýtt lið sökum hugar­fars­breytingar leik­manna. Ég hef aldrei séð svona áður.

Líta loks út eins og lið

Þá hafi Freyr smitað já­kvæðu and­rúms­lofti út frá sér um fé­lagið og yfir til stuðnings­manna.

„Maður sér meiri liðs­heild núna. Í upp­hafi tíma­bils gat maður séð að sumir leik­menn voru svo­lítið sjálf­hverfir en það er ekki að sjá núna. Kortrijk lítur út eins og al­vöru lið þar sem að leik­menn berjast fyrir hvorn annan.“

And­rúms­loftið í kringum fé­lagið er allt annað. Sam­band Freys við stuðnings­menn og fjöl­miðla hafi til að mynda farið mjög vel af stað. Það er eins og nýtt tíma­skeið sé hafið hjá Kortrijk. Helsta breytingin varði hugar­far leik­manna.

Átta stig af mögu­legum tólf í fyrstu fjórum leikjum Kortrijk undir stjórn Freys hefur eflt trúna hjá leik­manna­hópnum og stuðnings­mönnum en verk­efnið fram ­undan er ærið. Því þrátt fyrir gott gengi undan­farið er stað­reyndin þó sú að liðið er enn á botni belgísku úr­vals­deildarinnar. Trúin er þó til staðar.

„Í gær unnu þeir á heima­velli gegn Charleroi og leik­menn sögðust trúa hundrað prósent á krafta­verk. Menn efuðust dá­lítið fyrir leikinn en eftir leikinn gegn Charleroi sögðust sumir leik­menn trúa á krafta­verk með nýjum stjóra. Þeir höfðu meiri trú á þessu eftir Charleroi-leikinn og telja að þetta hafist. Þetta verður samt erfitt. En... ég trúi á þetta.“