Harðneitar ásökunum og segir úttektina tilbúið vopn gegn framboði Sólveigar

Eins og Vísir greindi frá í dag er dregin upp dökk mynd af stjórnarháttum Viðars og Sólveigar Önnu, fyrrverandi formanns Eflingar, en bæði sögðu af sér störfum í haust vegna ósættis við starfsfólk skrifstofunnar.

Þar hafa gengið á miklar ásakanir á báða bóga; starfólk stéttarfélagsins hefur sakað þau um ógnarstjórn og mikið af tilhæfulausum uppsögnum á mörgu starfsfólki en Viðar og Sólveig hafa neitað þessu og sakað starfsfólkið um að vinna gegn almennilegri kjarabaráttu félagsmanna. 

Sálfræðistofu fengið verkefnið í nóvember

Í nóvember í fyrra var sálfræði- og ráðgjafastofan Líf og sál fengin til að gera úttekt á vinnustaðnum og voru niðurstöður hennar kynntar starfsfólki Eflingar í morgun. Þar kom meðal annars fram að framganga Viðars gegn einhverjum starfsmannanna sé vinnustaðaeinelti og þá hafi hann gerst sekum um kvenfyrirlitningu. 

Við úttektina ræddi ráðgjafastofan við á fimmta tug starfsmanna. 

„Ég vissi að þessi úttekt hefði verið í undirbúningi síðan fyrir jól. Ég vissi líka að þessi úttekt yrði sterkasta vopnið í höndum hóps starfsfólks á skrifstofu Eflingar sem hefur lengi haft horn í síðu minni og Sólveigar Önnu Jónsdóttur fyrrum formanns Eflingar. Ég vissi að þessir einstaklingar myndu nota sér nafnleysi til að bera mig sökum og að niðurstöðunum yrði svo lekið á réttum tíma í fjölmiðla til að hámarka skaðann fyrir Sólveigu Önnu og framboð Baráttulistans,“ skrifar Viðar í yfirlýsingu sem hann sendi á fjölmiðla í dag.

Segir formann hafa hunsað athugasemdir

Hann gagnrýnir harðlega að ekkert samband hafi verið haft við hann við gerð úttektarinnar og hann því aldrei fengið að koma sínum sjónarmiðum á framfæri. 

„Ég get ekki skilið hvers vegna sálfræðistofan Lífs og sálar hefur látið hafa sig í slíka vegferð. Rétt er að fram komi að Agnieszka Ewa Ziolkowska, formaður Eflingar, hefur ítrekað hunsað athugasemdir sem komið hefur verið á framfæri við hana um vinnubrögð við gerð úttektarinnar,“ segir Viðar.

Frásögnin af því sem gekk á á vinnustaðnum sé því einhliða og að hans sögn algerlega ósönn. 

„Ásakanir sem hafðar eru eftir ótilgreindum starfsmönnum í vinnustaðaúttekt Lífs og sálar um einelti og kvenfyrirlitningu af minni hálfu eru ósannar. Hið rétta er að ég axlaði ábyrgð á því hlutverki mínu sem framkvæmdastjóri að gera eðlilegar kröfur til stjórnenda, með hagsmuni starfseminnar og félagsmanna Eflingar í huga. Ég harma það að þessir einstaklingar notfæri sér vanlíðan þeirra sem upplifað hafa raunverulegt einelti og kvenfyrirlitningu til að koma höggi á mig vegna ósættis sem snýst um frammistöðu og vinnubrögð í starfi,“ segir Viðar. 

Hann rekur samskipti sín við ónafngreindan stjórnanda, sem er þó greinilega kvenkyns, á skrifstofunni sem hann sagði upp og telur að hún sé aðal forsprakki þess sem hann kallar herferð gegn sér og Sólveigu Önnu.

Mistök á mistök ofan í starfi

Viðar segir að undirmenn stjórnandans hafi gert fjölda mistaka í starfi, sumra mjög alvarlegra, en þegar hann hafi reynt að vekja máls á því við stjórnandann hafi hún brugðist ókvæða við. Eftir að henni hafi síðar verið sagt upp störfum hafi hún sent erindi á stjórn Eflingar og sakað Viðar um óeðlilega framgöngu gegn sér, krafist veglegs starfslokasamnings og þess að honum yrði vikið úr starfi. 

„Jafnframt hafði hún safnað liði meðal annarra fyrrum stjórnanda sem af ýmsum ástæðum höfðu ekki átt samleið með félaginu á undangengnum árum, til að geta dregið upp þá mynd að annarlegar orsakir væru að baki því þegar leiðir stjórnenda skildu við félagið. Enginn þessara stjórnenda hafði þó haft uppi slíkar ásakanir fyrr. Umræddur stjórnandi vakti í erindi sínu til stjórnar Eflingar sérstaka athygli á því að þetta væru allt konur, án þess þó að ég væri berum orðum sakaður um kvenfyrirlitningu eða fordóma í garð kvenna. Var það þess í stað látið liggja í loftinu,“ segir Viðar.

Lengi skal konu reyna

Sólveig Anna segir í færslu á Facebook í dag ósatt að starfsfólk á skrifstofunni hafi margoft leitað til hennar til að segja sér af illri meðferð en hún ekki brugðist við. 

„Staðreyndin er sú að þetta er einfaldlega ósatt. Í eitt skipti var komið til mín eftir krókaleiðum. Mér var sýnt samansafn að ódagsettum og nafnlausum upplifunum einhverra sem störfuðu á skrifstofunni. Ég mátti ekki halda pappírunum eftir til að gaumgæfa þá. Ég mátti ekki fá að vita um hvaða manneskjur var að ræða. Í því samansafni af upplifunum sem mér var sýnt var ekki talað um ofbeldi eða áreiti. Ég gat ekki áttað mig á því um hvað margar manneskjur var að ræða sökum framsetningar en mér taldist til að sennilega væru þetta 5 manneskjur sem þarna hefðu skrifað.“

Nú sé hún í fréttum ásökuð um að hafa nært umhverfi kvenfyrirlitningar vegna vanhæfni minnar og/eða siðblindu. 

„Lengi skal konuna reyna.“

Hún segist vilja upplýsa um að þegar hún fékk af því fregnir að verið væri að spyrja starfsfólk skrifstofu Eflingar spurninga um sig, persónuleika hennar og starfshætti hafi hún á Þorláksmessu sent póst á þann starfsmann sem hélt utan um vinnuna og formann Eflingar.

Lesa má samskiptin sem Sólveig Anna birtir hér að neðan.

Síðan þá hafi hún ekkert heyrt. 

„Mér var aldrei boðið að taka þátt í „úttektinni“ og aldrei boðið að svara þeim ásökunum sem á mig eru bornar í henni. Þrátt fyrir þá pósta sem ég sendi og þið getið lesið hér að ofan. Og í dag hef ég ekki fengið tölvupóst frá Eflingu eða símtal frá formanni eða varaformanni þar sem mér er boðið að kynna mér niðurstöður úttektarinnar. En það hefur greinilega mikið kapp verið lagt á að koma þeim beinustu leið á fjölmiðla.

Ég og Viðar sitjum nú undir því að vera ásökuð nafnlaust um ýmsa glæpi sem við höfum ekki framið. Á nákvæmlega þeim tímapunkti þegar ég og félagar mínir á Baráttulistanum höfum komið fram glæsilegt og sigurstranglegt framboð til stjórnar félagsins.

Ég veit svarið en spyr samt: Er aldrei komið nóg?“