Skimanir hefjast að nýju 4. maí

Skimanir fyrir brjósta- og leghálskrabbameinum munu hefjast að nýju hjá leitarstöð Krabbameinsfélagsins 4. maí næstkomandi.

Hlé var gert á skimanir 24. mars síðastliðinn í samræmi við fyrirmæli Landlæknis vegna samkomubanns vegna faraldurs kórónuveirunnar sem valdið getur Covid-19 sýkingunni. Í tilkynningu frá Krabbameinsfélaginu segir að opnunin sé með þeim fyrirvara að faraldurinn blossi ekki upp af krafti að nýju.

Opnað hefur verið fyrir tímabókanir og eru þær konur sem hafa fengið boðsbréf frá leitarstöðinni hvattar til að bóka tíma sem fyrst.

Konur eru beðnar um að mæta á þeim tíma sem þær hafa bókað og hvorki of snemma né of seint. Þá skuli þær koma einar á stöðina og fresta komu finni þær fyrir flensulíkum einkennum.