11 dagar í EM: Dauðariðilinn sem Ísland hefði verið í

Ekki leikur neinn vafi á því að F-riðilinn er sá sterkasti af riðlunum sex á EM enda eru þar sigurvegarar síðustu þriggja stórmóta (HM 2014 og 2018 og EM 2016). Ungverjaland, sem komst á EM á kostnað Íslands ósælla minninga, verður í dauðariðlinum með þremur af stærstu fótboltaþjóðum heims.

Portúgal á titil að verja en liðin í F-riðli hafa unnið samtals sex af fimmtán Evrópumeistaratitlum sem keppt hefur verið um.

Heimsmeistarar Frakklands eru óárennilegir og portúgalska liðið í dag er sterkara en það sem varð Evrópumeistari fyrir fimm árum. Þjóðverjar eru í krísu en eru samt með gríðarlega sterkt lið og vilja eflaust kveðja Joachim Löw með stæl.

Þótt Ungverjar verði á heimavelli í fyrstu tveimur leikjum sínum í riðlakeppninni er erfitt að sjá þá ná í stig og forðast botnsætið í riðlinum. Baráttan um hin þrjú sætin er hins vegar galopin. 

Ungverjaland

Eftir 44 ára fjarveru frá Evrópumótinu komst Ungverjaland á EM í Frakklandi 2016. Liðið var í riðli með Íslandi, Portúgal og Austurríki og kom mjög á óvart með því að vinna hann. Ungverjaland tapaði svo fyrir Belgíu, 4-0, í sextán liða úrslitunum.

Ungverjar komust ekki á HM 2018 en þurftu endilega að komast á EM 2020. Tölum ekki meira um leiðina sem þeir fóru þangað.

Ef allt er eðlilegt verður ungverska liðið auðveld bráð fyrir hákarlana í F-riðli. En Ungverjar eru sýnd veiði en ekki gefin og hafa ekki tapað í síðustu níu leikjum sínum.

Ítalinn Marco Rossi hefur gert eftirtektarverða hluti með ungverska liðið sem hefur engu að tapa á EM. Ungverjar treysta mikið á Leipzig-tríóið, markvörðinn Péter Gulácsi, varnarmanninn Willi Orban og miðjumanninn Dominik Szoboszlai.

Portúgal

Þrátt fyrir að hafa aðeins unnið einn leik í venjulegum leiktíma stóðu Portúgalir uppi sem sigurvegarar á EM 2016. Portúgal olli vonbrigðum á HM 2018 en vann Þjóðadeildina 2019. Portúgalska liðið tryggði sér sæti á EM 2020 með því að lenda í 2. sæti B-riðils undankeppninnar.

Portúgalska liðið er ógnarsterkt og á pappírnum talsvert sterkara en það sem varð Evrópumeistari 2016. Síðan þá hafa frábærir leikmenn á borð við Rúben Dias, Bruno Fernandes, Bernardo Silva, Diogo Jota og André Silva bæst við hópinn.

Í broddi fylkingar hjá portúgalska liðinu er svo Cristiano Ronaldo sem skoraði sitt hundraðasta landsliðsmark síðasta haust. Ronaldo, sem er 36 ára, er á leið á sitt fimmta og kannski síðasta Evrópumót.

Frakkland

Frakkar stefna á að endurtaka leikinn frá síðustu aldamótum þegar þeir fylgdu heimsmeistaratitlinum 1998 eftir með því að verða Evrópumeistarar 2000. Og það kæmi lítið á óvart ef þeim tækist ætlunarverk sitt.

Franska liðið er svipað og á HM 2018 nema nú hefur Karim Benzema bæst við eftir fimm ára útlegð frá landsliðinu. Ekki veikist franska liðið við það.

Frakkar voru með Íslendingum í riðli í undankeppni EM og unnu hann. Frakkland vann átta af tíu leikjum sínum, gerðu eitt jafntefli og töpuðu einum leik. Frakkar unnu svo sinn riðil í Þjóðadeildinni og komust í úrslitakeppni hennar.

Franska liðið er svakalega sterkt og afar líklegt til afreka. Frakkar lentu í 2. sæti á EM á heimavelli 2016 en það kæmi ekkert á óvart ef þeir færu alla leið að þessu sinni.

Þýskaland

Síðustu ár hafa verið erfið hjá þýska landsliðinu. Það féll úr leik í riðlakeppninni á HM 2018 og gekk illa í Þjóðadeildinni 2018 og 2020. Flestir héldu að botninum væri náð þegar Þýskaland tapaði 6-0 fyrir Spáni í Þjóðadeildinni en svo kom afar óvænt 1-2 tap fyrir Norður-Makedóníu í undankeppni HM 2022. Þjóðverjar unnu þó sinn riðil í undankeppni EM sannfærandi.

Eftir fimmtán ára starf kveður Joachim Löw þýska landsliðið í sumar. Hann hefur kyngt stoltinu og hóað aftur í reynsluboltana Mats Hummels og Thomas Müller til að hjálpa þýska liðinu á EM.

Löw vill eflaust kveðja með stæl og skreyta ferilskrána með Evrópumeistaratitli. Þótt það sé varhugavert að vanmeta Þjóðverja á stórmótum eru þeir fyrirfram ekki eitt af líklegustu liðunum til afreka á EM.

Hvað gerist næst?

Tvö efstu liðin í riðlinum eru örugg um sæti í sextán liða úrslitum. Fjögur lið með bestan árangur í 3. sæti, í riðlunum sex, komast einnig í sextán liða úrslitin.

Sigurliðið í F-riðli mætir liðinu sem endar í 3. sæti A-, B- eða C-riðils.

Liðið í 2. sæti F-riðli mætir sigurliðinu í D-riðli (England, Króatía, Skotland, Tékkland).

Liðið úr 3. sæti F-riðils gæti mögulega mætt sigurliðinu úr B- eða C-riðli.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.