Albert skoraði tvö í fyrsta leiknum fyrir Fiorentina

Íslenski landsliðsmaðurinn Albert Guðmundsson var ekki lengi að láta að sér kveða í fyrsta leik sínum fyrir Fiorentina. Hann skoraði bæði mörk liðsins úr vítaspyrnum í 2-1 sigri gegn Lazio í ítölsku úrvalsdeildinni í dag.

Albert var lánaður til Fiorentina frá Genoa um miðjan ágúst. Vegna meiðsla varð talsverð bið á því að hann þreytti frumraun sína með liðinu.

Albert var í leikmannahópi Fiorentina þegar liðið tók á móti Lazio í dag. Hann byrjaði á bekknum en kom inn á sem varamaður í hálfleik ásamt Luca Ranieri. Lazio leiddi í hálfleik en Mario Gila kom liðinu yfir á 41. mínútu.

Í upphafi seinni hálfleiks braut Matteo Guendouzi á Alberti innan vítateigs og vítaspyrna var dæmd. Albert fór sjálfur á punktinn og skoraði framhjá Ivan Provedel í marki Lazio.

Á lokamínútu leiksins fékk Fiorentina aðra vítaspyrnu. Aftur steig Albert á punktinn og aftur skoraði hann og tryggði þeim fjólubláu sinn fyrsta sigur á tímabilinu. Lokatölur á Stadio Artemio Franchi í Flórens, 2-1, Fiorentina í vil.

Albert hefur nú skorað sextán mörk í ítölsku úrvalsdeildinni frá byrjun síðasta tímabils. Hann skoraði fjórtán deildarmörk fyrir Genoa í fyrra.

Mörkin úr leik Fiorentina og Lazio má sjá hér fyrir neðan.

Með sigrinum komst Fiorentina upp í 10. sæti ítölsku úrvalsdeildarinnar. Liðið er með sex stig eftir fimm leiki en það hafði ekki unnið sigur í vetur fyrir leikinn í dag. Lazio er með sjö stig í 7. sætinu.