Þjóðverjar fyrstir í 16-liða úrslitin

Þýskaland vann öruggan sigur á Nígeríu, 3-0, í fyrsta leik 16-liða úrslita heimsmeistaramóts kvenna í Grenoble í dag.

Þjóðverjar hafa komist í 8-liða úrslit á öllum átta heimsmeistaramótum kvenna.

Á 20. mínútu skoraði Alexandra Popp, fyrirliði Þýskalands, fyrsta mark leiksins með skalla eftir hornspyrnu Linu Magull. Popp lék sinn 100. landsleik í dag og hélt upp á áfangann með marki.

Sjö mínútum síðar jók Sara Däbritz muninn í 2-0 með marki úr vítaspyrnu. Yoshimi Yamashita dæmdi víti eftir að hafa skoðað atvikið á myndbandi. Däbritz er markahæst Þjóðverja á HM með þrjú mörk.

Þegar átta mínútur voru til leiksloka nýtti Lea Schüller sér mistök í vörn Nígeríu og skoraði þriðja mark Þýskalands. Lokatölur 3-0, Þjóðverjum í vil.

Í 8-liða úrslitunum mætir Þýskaland sigurvegaranum úr leik Svíþjóðar og Kanada.