Lyon vann PSG án Söru

Lyon vann 3-2 endurkomusigur í ótrúlegum leik í undanúrslitum Meistaradeildar Evrópu í dag. Var þetta fyrri viðureign liðanna af tveimur en leikið var á Parc Olympique Lyonnais, heimavelli Lyon. Sara Björk Gunnarsdóttir sat allan tímann á varamannabekk Lyon.

Marie-Antoinette Katoto kom gestunum yfir strax á sjöttu mínútu leiksins en Wendie Renard jafnaði leikinn úr vítaspyrnu á 23. mínútu. Catarina Macario, leikmaður Lyon, skoraði svo tvö mörk sitt hvoru megin við hálfleikinn til að koma Lyon í tveggja marka forystu áður en Paulina Dudek minnkaði muninn niður í 3-2 með marki úr vítaspyrnu á 58. mínútu.

Lokatölur 3-2 í leik sem hefur verið nefndur baráttan um Frakkland. Seinni viðureign liðanna er næsta laugardag og þá er óhætt að lofa spennu og hita miðað við fyrri leikinn.