Eng­land setur nýtt marka­met á EM eftir annan stór­sigurinn í röð

England kórónaði frábæra frammistöðu í A-riðli Evrópumótsins með 5-0 sigri á Norður-Írlandi í kvöld. England skoraði 14 mörk í riðlinum en fékk ekkert á sig.

Englendingar skoruðu fyrsta markið á 41. mínútu þegar Francesca Kriby náði frákastinu af marktilraun Lauren Hemp og smellti boltanum innanfótar upp í samskeytin á marki Norður-Írlands.

Bethany Mead tvöfaldaði forskot Englands einungis fjórum mínútum síðar. Boltinn datt þá fyrir Mead sem tók laglega á móti honum inn í vítateig andstæðinganna, lék á Rebecca McKenna í vörn Norður-Íra og rúllaði knettinum snyrtilega framhjá markverðinum Jacqueline Burns. 

Mead var þar með búin að skora mark í öllum þremur leikjum mótsins til þessa. Var þetta jafnframt fimmta mark Mead á EM sem er því aðeins einu marki frá markameti Þjóðverjans Inka Grings sem stendur í sex mörkum. 

Englendingar bættu við þriðja markinu í upphafi síðari hálfleiks þegar hann var einungis þriggja mínútna gamall. Markahrókurinn Bethany Mead átti þá góða fyrirgjöf af hægri væng sem rataði beint á kollinn á Alessia Russo sem þurfti einungis að stýra knettinum í netið framhjá Burns sem stóð hreyfingarlaus á marklínunni.

Russo, sem kom inn á leikvöllinn sem varamaður í leikhléinu bætti við fjórða marki Englands á 53. mínútu. Ella Toone átti þá fasta sendingu í lappir Russo sem tók frábæran snúning í fyrstu snertingu sinni og afgreiðslan var ekkert síðri, fast skot niður í fjærhornið.

Kelsie Burrows, leikmaður Norður-Írlands, varð svo fyrir því óláni að skora sjálfsmark á 76. mínútu þegar hún stýrði fyrirgjöf Mead í eigið net. Var það fimmta og síðasta mark leiksins en einnig 14 mark Englands í riðlakeppni EM, sem er nýtt met.

Norður-Írland spilar ekki meira á EM í ár en England leikur í 8-liða úrslitum næsta miðvikudag gegn annaðhvort Spán eða Danmörku, sem eigast við annað kvöld.